Museo Centro Gaiás

Cunha superficie expositiva de 6.600 metros cadrados, dividida en tres plantas, acolle exposicións temporais de fondo calado, o cal ofrece a posibilidade de amosar instalacións que pola súa envergadura non poderían exhibirse noutros centros culturais de Galicia. Ademais das exposicións, o Museo desprega unha oferta de actividades formativas e de divulgación que o convirten nun centro activo e en continua renovación.

Este edificio, que está conectado aos grandes circuítos internacionais, conta cun programa de Visitas guiadas á obra finalizada, no que poder gozar do espazo como unha obra de arte en si mesma.

A espectacularidade da súa fachada, os case 43 metros de altura e os seus máis de 16.000 m2 de superficie fan do Museo un dos edificios máis singulares e con máis posibilidades de uso da Cidade da Cultura de Galicia.