Casa das Asociacions de Cornes

O 15 de setembro de 1873 inaugurouse o primeiro ferrocarril de Galicia, entre Cornes (Conxo) e Carril, poñendo fin así ao histórico retraso para a súa construción. Coñecido como o Ferrocarril Compostelano da la Infanta Isabel, percorría unha distancia de case 42 quilómetros, pasando por seis estacións intermedias construídas en madeira (Casal, Osebe, A Escravitude, Padrón, Pontecesures e Catoira).

O día que se inaugurou, os pobos de Carril e Cornes (Conxo), saíron en masa cara as súas estacións. Este tren inaugural partía de Cornes e alí, na estación, reuníronse autoridades eclesiásticas, civís, militares, xudiciais e os máximos responsables deste ferrocarril que, a iso das once da mañá, asistiron á bendición das catro locomotoras que ían cubrir este servizo e que foran bautizadas cos nomes de Santiago, Carril, Pontevedra e Coruña, mentres soaban os compases das Bandas de Música de Artillería e a da cidade de Santiago, tocando a Marcha Real. Partiu o tren da estación de Cornes ás 12:04 do mediodía, e chegou a Carril ás 14:20 h da tarde.